Lady Altas, Bulldogs magpapatayan

MANILA, Philippines - Iisang koponan na la­mang ang maaaring ma­kausad sa susunod na ba­hagi ng torneo at ayan ang asam ng dalawang bagitong koponan.

Maghaharap ngayong araw ang National Univer­sity at Perpetual Help, pawang mga baguhan, upang madetermina kung sino sa kanila ang mapapasama sa limang iba pang koponan na pasok na sa quarterfinals ng ikalawang conference ng Shakey’s V-League Season 7 sa The Arena sa San Juan sa ganap na alas-2 ng ha­pon.

Nabigo ang Lady Bulldogs na masikwat ang hu­ling tiket sa quarterfinals makaraang biguin ng Ateneo noong Linggo sa tat­long sets habang napanatiling buhay ng Lady Altas ang kanilang tsansa ng kanilang magapi ang St. Benilde no­ong Linggo.

Sa kanilang unang pag­tatagpo, winalis ng NU ang Perpetual sa loob ng tatlong sets, 25-14, 25-20 at 25-22.

Sa main game, magba­bakbakan ang San Sebastian- Excelroof at Adamson University upang simulan ang quarterfinals stage ng naturang liga.