CEBU, Philippines - Adunay ipahigayon nga tigum ug seminar ang mga kadagkoan sa judo ug sa mga representante sa ubang mga kahugpongan gikan sa nagkalain-laing dapit sa Visayas ug Mindanao karong adlawa diha sa Applied Nutrition Center sa Brgy. Banilad, ning siyudad.
Gipasiugdahan sa Southern Philippines Judo Association (SPJA), ang kalihukan molatid og refereeing seminar ug isunod ang officials meeting.
Ang referee seminar pagadumalaon ni Philippine Judo Federation (PJF) referee director Alamjavier Indanan, samtang si PJF executive vice president for Region VII lawyer Vicente Fernandez II mao ang mangulo sa meeting.
Sa lain pang kalamboan, usa sa mga anak ni Fernandez nga si Joaquin, ang naapil sa line-up sa RP Team alang sa Asian Junior Sports Exchange Games 2010 didto sa Tokyo, Japan sa nanghinapos nga bahin ning bulan sa Agosto.
Ikaduha na kini ni Joaquin nga moapil sa maong kalihukan ug ning higayona, lauman niya nga maka-perform og maayo kay dili pa siya dugay nga gipaubos og subsob nga training pinaagi sa Asian Judo Youth Camp didto sa Bangkok, Thailand niadtong miaging bulan. (BANATSPORTS)