Adlawan naghari sa Keiz BJ Motors 5th anniversary Invitational moto-x

CEBU, Philippines - Gidominar ni Jonjon Adlawan ang premiere expert division sa Keiz BJ Motors 5th Anniversary Invitational Motocross niadtong Domingo didto sa Caduawan, Tabogon.

Gipilde ni Adlawan ang   lig-ong rider gikan sa Mindanao nga si Kemboy Pineda ug si Bornoc Mangosong nga miangkon sa ikaduha ug ikatulo nga dapit.

Si Clark Wagas, kinsa wala maapil sa top three sa experts division, maoy nanghawod sa novice open production batok nilang Rex Barbaso ug John Flores.

Misiaw sab ang executive riders sa pagpakita sa ilang mga tinagoang talento uban ni event organizer ug Keiz BJ Motors owner Siegfred Ornopia, kinsa maoy naghari sa Executive Selection/Limited Edition. Nagsunod ni Ornopia mao sila si Noli Rom ug Bobong Baluyos.

Giharian sab ni Russel Gungob ang executive A batok nilang Noli Rom ug Jun Enriquez, samtang si Titing Sicad mao ang naghari sa executive B.

Gisakmit sab ni James Mayol ang titulo sa mini 85 cc. class human niya gipilde si JP Cuesta. Ang anak ni Siegfred nga si Earl Jean Brylle mipahiluna sa ikatulo nga dapit. Si Brylle, kinsa bag-o lang sab mibalik sa aksiyon human makaangkon og injury nahimutang sab sa ikatulo sa mini 65 cc. nga gidominar ni Jonaricci Cuesta, gisundan ni BJ Pepito.

Ang mga igsuon ni Brylle nga sila si Ken Kerry ug Kerry Keizer nalandig sa ikaduha ug ikaupat nga dapit sa peewee division nga giharian ni Tamtam Largosa. Si Froilan Maraño maoy mi-okupar sa ikatulo

Si Jay Sanico maoy naghari sa local enduro division, gisundan nilang Erap Marquez ug Dongdong Batiquin.

Si Dondon Famador maoy mipatigbabaw sa "habal-habal" category pinaagi sa pagpilde nilang Dandan Berizo ug Ike Tombiga, samtang si Esoy Cuesta naghari sa Wanggits showdown.

Nagpaluyo sa maong lumba mao ang Sunriser Manufacturing Corp., Hon. Zigfred Povadora Duterte, Mayor Celestino Martinez ug Konsehal Alicia Mangubat. (BANATSPORTS)