CEBU, Philippines - Unang nakapabor ang no. 1 seed Brgy. Inayawan dribblers ni coach Doods Villareal human ilang gimakmak ang karibal nilang Brgy. Guadalupe, 110-99 sa Game-1 sa ilang "best-of-three" Conor Cup finals niadtong miaging gabii diha sa Mambaling Sports Complex.
Sa sayo pa, ang Brgy. Pardo nimasaker sa undermanned nga Bgry. San Nicolas Proper, 124-76 aron masakmit ang ikatulong puwesto.
Sila si Ope Abellana, Vergel Abelong ug Paolo Lumapas maoy nangu sa opensa sa Pardo batok sa San Nicolas, kinsa niduwa nga wala ang tulo nila ka pambato nga sila si ex-pro Danny Aying, ex-Lancer Rene Toring ug ex-SIT Skyblazer Reyland Jumalon.
Daku pa unta’g tsansa nga modaog ang Guadalupe tungod kay nakasikit sila ngadto sa kuwatro puntos, 95-99 sa nahabiling 3:26 sa duwa dihang na-technical si Wilson Gabucan. Tataw nga nakakuha na unta sila’g momentum dihang nangigo na’g maayo sila si Gabucan ug Alex Cainglet.
Apan si Cainglet gitawgan sab og technical dihang wala siya mopatuo sa referee nga hatagan og gamay’ng distansya ang sideline inbounder sa Inayawan.
Didto nagsugod og kaguba ang duwa sa Guadalupe ug namugnaw na kini resulta sa ilang kapildihan.
Si ex-CIT Wildcat Joseph Gungco mipabuhagay og 37 puntos, 13 niini ang gikan sa third period aron pangulohan ang Inayawan, samtang ang ex-UC Webmaster gunner nga si Allain Abellanosa kinsa miduwa sa labing unang higayon, midugang og 18 puntos, 11 niini gikan sab sa third period.
Wala moduwa ang ilang sentrong si Baltazar Jueves, apan nasuwertihan kini kay wala man sab moduwa sila si Michael Almonte ug Abe Galinato sa Guadalupe.
Puntos Matag Usa
Inayawan (110) - Guangco 37, Abellanosa 18, Abasolo 12, Daculan 11, Baguio 11, Cabrera 6, Dico 6, Cabo 5, Toroy 4
Guadalupe (99) - Gabucan 30, Cainglet 23, Lopena 20, Gacho 13, Cosido 10, Minoza 4. – BANAT NEWS