1st Wireless Beach Volley Women's Open karong Agosto 28-29

CEBU, Philippines - Magpinuhalay na sab sa ilang abilidad ang mga banggiitang beach volley stalwarts dinhi sa Sugbu pinaagi sa pagpahigayon sa 1st Wireless Beach Volley Women's Open nga gikatakda karong Agosto 28-29 diha sa Wireless sa Mandaue City.

 Ang kanhi sakop sa RP Team ug kanhi Nestea national champ nga si Jusabelle Brillo ug RP Youth mainstay Genie Sabas mao ang pipila ka mga bitoon nga angayang lantawon sa duha   ka adlaw nga kompetisyon.

Lain pang tandem, kinsa nikompirmar sa ilang partisipasyon mao sila si Mechelle Matuguina ug Jullete Mae Marikit, Kennette Garces ug Marissa Lagancia, Czarie Cañete ug Kathy Jumapao, Cheche Bohol ug Florian Guttierez ug ang managsuong Queenilyn ug Syril Rivera.

Ang Cebu Schools Athletic Foundation Inc. (CESAFI)-bound athletes gidid-an pagsalmot sa kompetisyon.

"We did not allow them to play in our tournament because we don’t want them to be in conflict since we assume our tournament coincides with the CESAFI schedule," matud ni event organizer Cristina Ybañez.

Ang registration nagkantidad og P500 matag team.

Gawas sa mga tropeyo, ang kampiyon mobulsa og P5,000, ang second placers makadawat og P3,000, samtang ang third placers makaangkon og P2,000. – BANAT NEWS