CEBU, Philippines - Nakalingkawas ang University of the Visayas (UV) Baby Lancers sa tulo ka rallies nga gilusad sa University of Cebu (UC) Junior Webmasters ug mi-iskor kini og 85-76 nga kadaugan aron temporaryong maghari sa secondary division sa 10th Cebu Schools Athletic Foundation Inc. (CESAFI) basketball event kagabii diha sa Cebu Coliseum.
Si Gerald Legarde maoy daku og natabang sa Baby Lancers ilabi sa iyang pagpakgang sa third quarter rally nga gihimo sa Junior Webmasters, kinsa misikit, 45-55 gikan sa 29-44 nga alkanse. Si Legarde maoy nangu sa Baby Lancers nga mipabuto og 22 puntos.
Ang Junior Webmasters subling mihulga pagsugod sa final period diin milusad kini og 10-0 run kortesiya nilang John Raphael Aranas ug Alvin Labolabo aron pahakan ang labaw ngadto sa otso puntos, 61-69 sa tunga-tungang bahin sa fourth period.
Mi-rally ang Junior Webmasters sa ikatulong higayon, apan wala na kini makalahutay kay ang Baby Lancers nakabaton na og double figures nga bentaha.
Si Aranas maoy topscorer sa Junior Webmasters pinaagi sa iyang 21 puntos, gisundan ni Labolabo nga adunay 15 puntos.
Puntos Matag Usa
UV (85) - Legarde 22, Mendoza 14, Suan 14, Aguirre 10, Smith 7, Dennison 5, Cenita 3, Dela Torre 2, Undaloc 2
UC (76) - Aranas 21, Labolabo 15, Yburan 9, Talisic 7, Comendador 6, Otida 6, Pua 4, Culango 4, Nemeño 2, Legaspi 2. – BANAT NEWS