Beltran mibuak record sa swimming event

CEBU, Philippines - Si John Michelson Beltran sa University of San Jose-Recoletos (USJ-R) mikulit sa iyang ngalan isip labing unang record-breaker sa swimming event sa 15th Milo Little Olympics-Visayas Finals diha sa Cebu City Sports Center (CCSC).

Gitapos ni Beltran ang 200m individual medley sa record time nga dos minutos ug 34.37 segundos, mas kusog sa karaang rekord nga 2:38.22 nga gikuptan ni Jabe Cane.

Ang kadaugan ni Beltran mao ang mihaw-as sa USJ-R sa kadaugan human usab mapakyas ang iyang mga kauban sa paghatag og bulawan sa ilang koponan.

Sama ni Beltran, nabuak usab ni Yona Academia sa Silliman University (SU) ang rekord sa secondary 100m girls breaststroke sud sa dos minutos ug 28.15 segundos batok sa kanhi record-holder nga si Denise Echavez sa University of San Carlos (USC) nga nalagpot sa ikatulong dapit human mi-oras og 1:30.81. Si Loren Goyenechea sa USJ-R maoy misakmit sa silver medal sa oras nga 1:29.62.

Sa track and fields, si Roy Villahermosa sa University of Cebu (UC) maoy nanghawod sa 400m hurdles sa oras nga 58.76 segundos.

Human sa duha ka adlaw nga aksiyon, kasamtangang nag-una ang USC-BED sa secondary division sa ilang 55 puntos, gisundan sa SU ug UC sa ikaduhang dapit sa ilang 40 puntos, samtang ang Abellana National School (ANS) adunay 27 puntos.

Nag-una sa elementary level ang USC sa ilang 55 puntos, samtang ang Silliman adunay 30 puntos ug West City Elementary School nagbitbit og 25 puntos. (BANAT)