Magis Eagles daug na gyud

CEBU, Philippines - Midagit sa labing una nilang daog ang Sacred Heart School-Ateneo de Cebu Magis Eagles dihang ilang gipanitan ang Don Bosco Technology Center (DBTC) Junior Greywolves, 84-6,1 sa secondary match sa nagpadayong Cebu Schools Athletic Foundation, Inc. (CESAFI) kagabii diha sa Cebu Coliseum.

Pinangulohan ni Adrian Muller kinsa miposa og nuybe puntos sa first period, ang Magis Eagle milusad og bangis nga 27-13 rally alang sa 17 puntos nga labaw sa halftime, 47-30.      

Si Muller miwadwad og 21 puntos alang sa Magis Eagle nga mipapas sa kahigayunan sa Junior Greywolves nga masakmit ang daog. Ang Junior Greywolves nakahiagum karon sa ikatulo nilang pilde, duha niini nagagikan sa ilang kaparotan batok sa Cebu Eastern College (CEC) Dragons ug sa University of Cebu (UC) Junior Webmasters.

Uban ni Muller nga mitimon sa Magis Eagle mao ang point guard nga si Henry Renzar Asilum kinsa miduslit og 15 points, samtang si Darwin Henric Ochea ug Bradley Bacaltos midugang og 10 ug 12 points matag usa.

Ang Junior Greywolves ni rookie coach Danny Aying gipangulohan nila ni Jade Francis Jaben ug Mark Anthony Elizondo II kinsa miiskor og 11 ug 10 puntos matag usa.

Sa sayu pa, gikunis-kunis usab sa University of Southern Philippines-Foundation (USP-F) Baby Panthers ang Cebu Institute of Technology (CIT) Wildkittens, 76-64. Ang sinaligan nga si Joshua Corcilles mibugwak og 23 puntos aron masakmit ang 1-1 record alang sa Baby Panthers, samtang si Clyvin Limama maoy nangulo sa Wildkittens sa iyang 28 puntos.

Sama sa Baby Panthers, ang Wildkittens aduna usay 1-1 record, human sa ilang kadaugan batok sa UV Baby Lancers niadtong miaging semana pinaagi sa forfeiture.

Puntos matag usa

Unang duwa:

USP-F (76)-----   Corcilles 23, Gigante 17, Diapera 16, Roble 7, Metante 4, Cavan 2, Neri 2, Matthews 2, Pitogo 1

 CIT (64)-----        Limalima 28, Lucena 10, Delima 7, Laborte 6, Neri 4, Abacahan 4

Ikaduhang duwa:

 SHS (84)----      Muller 21, Lim 21, Asilum 15, Ochea 12, Bacaltos 10, Diputado 7, Gabuya 6, Tecson 4, Saldo 2

 DBTC (61)---      Jaben 11, Elizondo 10, Yap 7, Alburo 7, Pono 6, Ruiz 5, Villahermosa 3, Gelasque 2, Mellijor 2, Tabasa 2, Carbon 1, Castro 1 (FREEMAN)