CEBU, Philippines - Human mipahiluna sa ikaduhang puwesto sa overall standing sa miaging tuig, ang Abellana National School (ANS) walay laing misyon kun dili ang pagkatkat sa kinatumyang bahin sa pagsugod sa aksiyon sa 15th Milo Little Olympics-Visayas Finals karong adlawa diha sa Cebu City Sports Center (CCSC).
Uban ni Francis Ramirez, kinsa mao karon ang mangulo sa ANS-MAPE department, tuyo karon sa ANS nga manghawod karong tuiga.
Gani si event organizer Ricky Ballesteros naghinamhinam sa gubat tali sa UC ug ANS sa secondary level, samtang ang elementary department wala pay matudlo kun kinsa ang maghari.
Tanang duwa gawas lang sa gymnastics magsugod na karon diha sa CCSC. Ang Gymnastics ugma pa sugdan ug tiwason sa Agosto 14.
Ang chess adto ipahigayon sa Mabolo Elementary School samtang ang taekwondo didto sa Mabolo Sports Complex. Ang table tennis anha sa UC-main campus ug ang sipa ug sepak- takraw adto duwaon sa Labangon Elementary School.
Ang tennis adunay duha ka binyu diin ang elementary tennis adto sa Baseline Sports and Recreational Center ug ang secondary adto sa Alta Vista Golf and Country Club. Ang mga duwa sa volleyball sa elementary division anha ipahigayon sa CCSC, samtang ang secondary boys ipahigayon sa City Central School ug ang girls sa nataran sa ANS. - BANAT NEWS