CEBU, Philippines - Mibugwak og mga puntos ang Cebu Easten College (CEC)-Dragons sa unang-tulo ka kuwarter, apan sa fourth period, napugngan kini sa mangtas nga University of the Visayas (UV) Baby Lancers aron pagkulit og 81-76 nga kadaugan kagahapon sa nagpadayong 10th Cebu Schools Athletic Foundation Inc. (CESAFI) secondary division diha sa Cebu Coliseum.
Sila si Gerald Legarde ug Alwin Aguirre mi-iskor og 22 puntos matag usa aron pangulohan ang Baby Lancers.
Naglabaw lang og uno punto, 71-70, si Legade miposa og upat ka sunod-sunod nga puntos aron inaton ang labaw ngadto sa singko puntos, 75-70 ug mitubo pa kini ngadto sa 78-70 kortesiya nilang Aguirre ug Lucky Suan.
Si Nike Montalbo, ang topscorer sa Dragons mirehistro og game-high 23 puntos, mihimo sab og upat ka sunod-sunod nga puntos alang sa Dragons nga misikit na sab, 74-78, apan nausik ang ilang mga paningkamot kay nahutdan kini sa oras. Si Montalbo mi-iskor og 11 puntos sud lang sa fourth quarter.
Ang Dragons maoy naglabaw paghuman sa third period, 59-55 human sa basket ni James Neil Sumayang. Apan ang maong labaw gikalingawan og kitkit sa Lancers sa final period hangtod nga naihaw ang Dragons.
Sa laing duwa sa secondary, ang University of San Carlos (USC) Baby Warriors midemolis sa gagmitoy nga University of San Jose-Recoletos (USJ-R) Baby Jaguars, 86-67.
Si Francis Guardario adunay 15 puntos alang sa Baby Warriors, samtang sila si Anthony Gay Romaguerra ug Harvey Palapar miamot og 14 puntos matag usa ug si Lorenzo Bacaltos mitampo og 12 puntos.
Si Julius dela Peña, mao sab ang nangu sa Baby Jaguars pinaagi sa iyang 19 puntos. - BANAT NEWS