SWU temporaryong naghari

CEBU, Philippines - Mitukob sa ilang ikaduhang sagunson nga kadaugan ang Southwestern University (SWU) Cobras human sa ilang impresibong 80-59 nga kadaugan batok sa University of Southern Philippines-Foundation (USP-F) Panthers aron temporaryong magsolo sa liderato sa 10th Cebu Schools Athletic Foundation, Inc. (CESAFI) diha sa Cebu Coliseum.

Ang 2-0 nga Cobras, mosuway paglansang sa ilang ikatulong daog apan dakung hagit ang ilang atubangon batok sa University of Cebu (UC) Webmasters nga gipangulohan ni 6-foot-9 June Mar Fajardo, kinsa maoy nangu sa ilang 89-65 nga kadaugan batok sa undermanned nga University of San Carlos (USC) Warriors niadtong Martes.

Bisan og wala na makaduwa sa kinatibuk-ang fourth period ang beteranong point guard nga si Aard Diango tungod sa piang sa iyang bukton, wala gihapon tugoti sa Cobras nga makagukod ang Panthers nga nag-anam kapawong padulong ngadto sa nagkaupos nga oras sa duwa.

Si Rene Pacquiao maoy nagmangtas alang sa Cobras nga mipabuto og 24 puntos ug iyang gipakita nga mas daku na siya’g umento kun itandi sa miaging tuig.

Si Cris Litorja pabiling dakung hulga sa iyang outside shots ug kanunay siyang makakita og libreng lugar. Mi-iskor lang siya og nuybe puntos, apan daku kaayo siya'g natabang sa maong kadaugan.

Samtang gisusi ang piang ni Diango sa CESAFI therapist nga si Dr. Roel Dejano, ang back-up guard nga si Benito Ortuyo Jr. maayo kaayong nakadala sa iyang papel isip playmaker ug sama lang gihapon sa walay nahitabo pagbiya ni Diango kay pakyas ang Panthers sa pagsikit hinungdan sa ilang ikaduhang sagunson nga kapildihan.

Sila si Gil Wagas ug Eleazar Armecin mitampo sab og double figures alang sa Cobras sa ilang 13 ug 10 puntos matag usa.

Si Fritz Dajalos lang gihapon maoy nagpakita og dakung katakus alang sa opensa sa Panthers diin miposa siya'g 17 puntos, samtang si Lawrence Marano midugang og 14 puntos.

Puntos Matag Usa

SWU (80) - Pacquiao 24, Wagas 13, Armecin 10, Litorja 9, Ortuyo 5, Nalos 5, Guillena 4, Diango 4, Pria 3, Goloran 2, Maguate 1

USPF (59) - Dajalos 17 Marano 14, D. Ferraren 7, Rivera 4, J. Ferraren 4, Bardillas 4, Sedurifa 4, Durano 2, Misa 2. - BANAT NEWS