15th Milo Little Olympics buksan na

CEBU, Philippines - Ang 15th Milo Little Olympics-Visayas pormal na buksan karong hapon uban sa tulo ka masidlakong sepak-takraw prospects Rhey Jey Ortouste, Lord Kevin Largado ug George Jam Buhayan nga maoy modagkot sa urna sa kalinaw ug kahiusahan diha sa Cebu City Sports Center (CCSC).

Sila si Ortouste, Largado ug Buhayan sa Abellana National School (ANS) pulos niduwa sa nasud sa miaging Asean Youth Sepak Takraw Championship gawas sa nasud.

Ang tulo mao sab naghawan sa dalan alang sa kadaugan sa ANS sa MLO sa miaging tuig.

Gipili sa organizers ang tulo ka mga atleta aron madasig ang laing liboan ka batan-ong magduduwa aron moladlad sa ilang maayong labok sa duha ka weekend nga multi-sporting event.

Ang Nestle Philippines mibubo og minilyon sa ilang resources alang ning maong kalihukan nga dili lang lonlon sa marketing strategy, apan sa ilang saad pagtabang sa Philippine sports pagkaplag og bag-ong mga talento aron morepresentar sa nasud alang sa internasyonal nga kompetisyon.

Gipaabot nga adunay mga bag-ong players ang mogimaw sa athletics, badminton, chess, football, gymnastics, tennis, scrabbles, sepak takraw, sipa, swimming, table tennis ug taekwondo gumikan kay kasagaran sa mga bantugang atleta sa miaging tuig ang migradwar na sa hayskul.

Adunay 207 ka tunghaan, 108 sa elementary division ang magbangga dili lang aron maghari sa usa ka sport, kun dili alang sa overall standings.

Gawas nga magtigi alang sa bulawan, ang mga atleta makakuha sab og luna alang sa National Championships nga gikatakda karong Oktubre didto sa Cagayan de Oro.

Ang bag-ong napiling chairman sa Philippine Sports Commission (PSC) nga si Richie Garcia gilauman motambong sa opening ceremonies.

Si Cebu City Mayor Michael Rama, DepEd-VII Regional Director Recaredo Borgonia, Milo Sports Executive Pat Goc-ong ang gikatakda sab motambong sa opening ceremonies.

Molamas sa opening ceremonies mao ang paghagpat og Miss Milo Little Olympics 2010 ug ingon man ang cheerdance contest nga pagaapilan og pito ka teams sa elementary ug lima sa secondary.

Ang games proper ugma pa sugdan sa managlahing binyu. Kasagaran sa mga duwa anha ipahigayon sa CCSC. – BANAT NEWS