15th Milo Little Olympics-Visayas gilusad

CEBU, Philippines - Pagpahigayon og qualifying tournament sa mga dagkung siyudad ug pag-host og regional leg sa nagkalain-laing lugar maoy nag-una sa mga plano sa Nestle Philippines alang sa Milo Little Olympics.

Kini maoy gipadayag ni Milo Sports Executive Pat Goc-ong atol sa pormal nga paglusad sa 15th MLO Visayas Finals kagahapon diha sa Cebu City Sports Center (CCSC).

Sa kaso sa Visayas region, ang Cebu City mao kanunay ang mo-host. Gani ang labing unang MLO National Championships dinhi gipahigayon sa siyudad sa Sugbu.

Nanghinaut ang mga organizers nga hapsay ang dagan sa Visayas leg labi na nga ang mga adlaw sa kompetisyon gihimo na la'g tulo ug tunga, inay sa naandan nga upat ka adlaw. 

Ang Visayas Finals buksan ugma sa CCSC, samtang ang mga duwa unya pa sa Agosto 7-8 ug sa Agosto 14-15.

“With this, we have to speed up everything such as the flow of games and results para maka-awarding dayon right away,” nagkanayon si MLO Visayas local coordinator Ricky Ballesteros.

Gawas sa paglaslas sa adlaw sa kompetisyon, gitangtang usab ang pagpili sa Most Outstanding Athlete sa regional level dinhi, apan adunay managlahing MOA awardees sa boys ug girls division sa National Final nga gikatakda sa Septiyembre didto sa Cagayan de Oro.

Mga duwa nga kumbatihan mao ang athletics, badminton, chess, football, gymnastics, lawn tennis, scrabble, sepak takraw, sipa, swimming, table tennis ug taekwondo.

Adunay 15 ka events ang gipuno sa swimming, samtang kadtong mga tunghaan nga   kompleto'g line-up ang tugotan nga makasalmot sa racket sports nga karon usa na ka team competition. Sa taekwondo, kadto lang mga black belters ang tugotang makaapil sa advanced level. (BANAT NEWS)