Abe King nangangalap ng tulong kay Guidaben

MANILA, Philippines - Mula sa pagiging magkaribal sa hardcourt hanggang sa kanilang matibay na pagkakaibigan sa United States.

Si dating Toyota po­wer forward Abe King ang nangu­nguna sa pagtulong at paghingi ng suporta para kay dating Crispa cen­ter Abet Guidaben na kasaluku­yang nakaratay sa ICU sa isang ospital sa New Jersey dahil sa pambihirang sakit na Myasthenia Gravis.

“Iyong sakit niyang Myas­thenia Gravis, ma­gan­dang-maganda ang pakiramdam mo tapos bigla ka na lang manghihina,” sabi ni King sa panayam ni Dennis Principe sa kan­yang “Sports Chat” sa DZSR Sports Radio ka­hapon mula sa Seattle, Washington, USA ukol sa dumapong karamdaman sa two-time PBA Most Valuable Player awardee na si Guidaben.

Ang grupo ni King na PBA Legends USA Foundation ang siyang umaagapay ngayon sa gastusin sa ospital ng 57-anyos na dating sentro ng maalamat na Crispa Redmanizers na naging karibal ng To­yota Super Corollas noong 1980’s sa PBA.

Kabilang sa mga sinto­mas ng MG ay ang kahira­pan sa pagsasalita, kahirapan sa paglunok at ang paglambot ng muscles sa ba­tok at leeg.