Toquerro mipukan ni Torbiso sa "The Art of War"

CEBU, Philippines - Ang Muaythai National Team member Eugene “El Torrero” Toquerro nangayo lang og 46 segundos aron pahunungon ang MMA fighter Johnjier “The Dangerous” Torbiso sa main event sa Extreme Muaythai Championship –“The Art of War” niadtong miaging gabii didto sa Mango Square , ning syudad.

Unang milusad og bangis nga pagpangatake ang batan-ong Torbiso kinsa mipabaha og mga kinumo ngadto sa lawas ni Toquerro, apan ang 2007 Asian Muaythai Champion migamit sa iyang pabor sa kasinatian ug kalit nga mipatugpa og makusug nga right knee nga mipahayang ni Torbiso.

Ang makusug nga tira ni Toquerro mibukas og ngil-ad nga gisi sa walang kilay ni Torbiso nga maoy nakapaaghat sa referee nga ihunong ang away.

Sa co-main event, si Joseph “The Samurai” Eder migawas nga mananaug human niya gipilde ang 2000 Muaythai gold medalist Gino “Projectile” Po kinsa wala na makapadayon sa away sa round 4 human sa grabeng kakapoy ug sa injury sa gusok tungod sa mga knee kicks ni Eder sa iyang lawas.

Midominar usab sila si Benjamin Capisnon ug Jiody Arcenal sa Bullet Muay Thai stable batok sa tagsa-tagsa nila ka mga kaatbang. Si Capisnon mi-TKO ni Sammy Embalsamado sa Xcalibur, samtang si Arcenal midaog via referee stoppage batok ni Jonathan Nacua.

Si Pablo Santillan sa Durex Dragon stable mipatumba ni Jimmy Gamboa sa round 2, samtang si Junrey Soquite miiskor og unanimous decision nga kadaugan batok ni Jojito Estanel.

Lahi sa gidangatan sa iyang maguwang, ang 15-anyos nga si John Edu Torbiso midaog usab pinaagi sa KO sa 1:14 sa unang round batok ni Noel Umali. (BANAT NEWS)