CEBU, Philippines - Nagmakuli ang Alaska Aces paghatag sa Talk N’ Text Tropang Texters sa luna sa finals, human nila gisakmit ang 94-83 nga kadaugan sa Game-6 aron tablahon sa 3-3 ang standing sa ilang “best-of-seven” semifinals series sa PBA Fiesta Cup kagabii didto sa Araneta Coliseum.
Tungod kay nameligro sila nga matagak batok sa Texters, gipagawas sa Alaska ang tanan nilang kusug sa second half aron pildehon ang mas dagkung Texters ug aron mahayagan pa ang ilang kahigayunan nga masakmit ang luna sa finals.
Ang Alaska ug Talk N’ Text mopahigayun sa ilang “do-or-die” game karong Miyerkules didto sa Araneta Coliseum.
Naglabaw og kwatro puntos ang Alaska sa nahibiling singko minutos sa third period, apan giinat kini nila ngadto sa otso sa dayong tapos sa kuwarter dihang nangigo sa three-point line si LA Tenorio kinsa maoy top scorer sa Aces sa iyang 12 puntos og lima ka assists.
Pag-abot sa final period, imbes nga gukdon ang Alaska, namugnaw na hinuon ang Texters ug wala na nila maatbangi ang bangis nga opensiba sa Aces nga miinat sa labaw ngadto sa 19 puntos, 89-70.
Misuway pag-apas ang Texters human nila nakan-an ngadto sa nuybe puntos ang labaw sa Aces, 90-81 human sa mga tira nila ni Kelly Williams ug Jared Dillinger, apan nakuwangan sila sa oras aron masakmit ang daog. (BANAT NEWS)