CEBU, Philippines - Ang numero unong scrabble player sa nasud nga si Engr. Teodoro Martus Jr. mosuway og langkat sa korona sa National Association for Scrabble Association in the Philippines (NASCAP) tournament nga mosikad karong adlawa didto sa SM City Makati Activity Center.
Mga tang-ang scrabble player lukop nasud ang mopakita sa ilang katakus ning duha ka adlaw nga kompetisyon.
Gawas ni Martus Jr., ang iyang kauban sa University of the Visayas Alumni nga sila si Michael Laput, Orville James Alagaban ug senior student nga si Jowar Ayuno ang mipadayag sab sa ilang partisipasyon.
Moduyog sa duha ka adlaw nga torneyo mao ang Luzon qualifying Scrabble Championship (WYSC). Ang katapusang adlaw sa torneyo, magsilbeng launching sa 5th WYSC nga gitukod sa NASCAP karong Disyembre 8-10 didto sa Makati City.
Ang mga Sugbuanong players kinsa mosalmot sa tinuig nga international sporting event mao sila si Joy Policher, Mae Villagonzalo ug Kheil Acasili sa UV ug Nathaly Cabaluna sa University of San Jose-Recoletos ug Albert Alcovendras sa Cebu Institute of Technology University. – BANAT NEWS