CESAFI season 10 buksan na

CEBU, Philippines - Usa ka engrandeng opening ceremonies nga wala pa masaksihi sukad masukad ang makita karon inig ulbo sa 10th Cebu Schools Athletic Foundation Inc. diha sa Cebu Coliseum.

"Power and Dominance" maoy tema karon tuiga, diin   magsugod na sab sa ilang kampanya ang nine-time champion University of the Visayas (UV) Green Lancers.

Ang mga duwa pormal nga buksan human sa grand opening program nga pagasugdan pinaagi sa Santos nga Misa nga pagadumalaon ni Rev. Fr. Enrico Peter Silab, OAR, uban sa co-celebrants sa ala-1 sa hapon.

Si Joevin Eusebio, ang marketing head sa CESAFI miingon nga   duna sila'y mga pasabog ug   gamit ang mga bag-ong teknolohiya, dili na unya maglayo ang opening sa CESAFI kun itandi sa UAAP ug sa NCAA didto sa Manila ug may kaugalingon na unya kini nga timailhan.

Sa gipaabot, ang opening program magpakita sa mga talento sa Sugbu nga buhong sa kultura ug ipasundayag kini pinaagi sa dance numbers nga gitawag og "Cebu the Festival Island."

Walo ka member schools ang mopasundayag ug mopakita sa ilang labing maayong talento.  

Gawas sa sayaw, ang CESAFI mopili sab og Miss CESAFI 2010 alang sa collegiate ug high school divisions.

Daghan pang mga pakulo ang giandam sa CESAFI 10th season ubos sa ilang presidente Engr. Rolando Villa sa University of Southern Philippines-Foundation (USP-F) ug commissioner Felix Tiukinhoy, Jr.

Usa sa labing daling mabantayan mao ang pagpalig-on sa Cebu Eastern College (CEC) Dragons aron malikayan ang maka-uuwaw nilang kasinatian sa miaging tuig diin kanunay silang gimasaker sa ilang mga kaatbang.

Dili hinuon kampiyonato ang gipasalig sa bag-ong coach sa Dragons nga si Jerry Jaranilla apan iyang pasalig nga lahi karon ang dagan sa ilang team kun itandi sa miaging tuig. Bisan lang sa usa nila ka daog, mahimo na kining kasaysayan sa ilang team.

Ang labing dakung nabihag sa Dragons mao si Johnmar Lou Regidor, anak ni kanhi PBA player ug ex-USC Warrior Lou Regidor.

Ilang sangkaon ang Sacred Heart School-Ateneo de Cebu (SHS-AdC) sa alas 4:30 sa hapon inig human sa programa.

Sa miaging tuig, nagpakita sa ilang katakus ang SHS-AdC diin init kaayo ang ilang pagsugod, apan nabugnaw sa ilang katapusang tulo ka duwa ug natagak sa torneyo.

Sa bugtong duwa sa collegiate, ang USP-F Panthers makigbugno sa Cebu Institute of Technology (CIT) Wildcats. – BANAT NEWS