CPPO sportsfest gibuksan

CEBU, Philippines - Pormal nga gibuksan ang Cebu Provincial Police Office (CPPO) Sportsfest   nga tipik sa ika-50 nga kasaulogan sa Police Community Relation’s (PCR) Month karong buwana.

Usa ka parada nga gisalmotan sa mga magduduwa gikan sa kapolisan ug sa mga sakop sa media maoy mitimaan sa pagsugod sa maong sportsfest diha sa provincial headquarters, diin gihimo ang mubo nga programa nga gitambongan ni ex-PBA Bonel Balingit.

Walo ka teams ang misalmot sa basketball ug kini mao ang CPPO ni team manager Sr. Supt. Erson Digal, Regional Operation and Plans Division (ROPD)-7 ni Sr. Supt. Ernesto Agas, RBAND sa PRO-7, Cebu PNP 2nd District ni Sr. Insp. Welbert Parilla, Cebu PNP 3rd District ni Insp. Gerard Pelare, Provincial Public Safety Management Company (PPSMC) kanhi 703rd PMG ni Chief Insp. Bonifacio Tecson ug ang DySS/DyRT ni super Gabriel Bonjoc ug ni playing coach super Guam Logronio.

Una kining higayon sa kasaysayan sa CPPO nga adunay gihimong sportsfest ug kini nahimo ubos sa pagdumala ni Sr. Supt. Digal.

Gihimo kini ni Sr. Supt. Digal aron dili mawala ang camaraderie sa tanang polis sa probinsya pinaagi sa sportsfest.

Sa laing bahin, ang CPPO    mikulit sa una nilang daog dihang ilang giposasan ang DySS sa iskor nga 95-89 didto sa Brgy. Apas gym, ning siyudad.

Si PO1 M. Pace mipabuto og 18 puntos aron pangulohan ang CPPO, samtang ang pilderong DySS gipangulohan sab ni Gabriel Bonjoc, kinsa miburak og 37 puntos.

Puntos Matag Usa

CPPO (95) - PO1 Carmilotes 19, PO1 M. Pace 18, Insp. Audie Pelayo 15, PO1 J. Deiparine 15, PO2 R. Ong 9, PO3 Rivera 6, PO3 Borro 4, SPO1 Rivera 2, PO2 Coyacut 2, PO3 Morgado 2, PO1 Balili 1

DYSS (89) - G. Bonjoc 37, J. Racaza 24, T. Grafe 16, Morgado 10, Lagos 2. – BANAT NEWS