CEBU, Philippines - Gawas lang sa kakuwang og dominanteng sentro, malaumon gihapon ang ninth-time champion University of the Visayas (UV) Green Lancers nga makahimo gihapon sila paglangkat og laing titulo sa Cebu Schools Athletic Foundation, Inc. (CESAFI).
Wala na sila’y laing nakita nga kakulian bisan og wala ang ilang 6-foot-11 Gregory Slaughter, kinsa pormal na nilang gitugyan ngadto sa Ateneo Blue Eagles.
Mao kini ang pasalig ni assistant coach Al Solis nga maoy nagpresentar ni coach Elmer 'Boy' Cabahug sa Lancers atol sa press launch niadtong miaging adlaw didto sa Cebu Coliseum function room. Matud pa niya, gawas sa no. 5 nga posisyon, wala makabentaha ang ubang teams gikan sa no. 1 ngadto sa no. 4 nga position.
Gawas nga mas lig-on ang uban nilang position kun itandi sa laing teams, mas nakabentaha ang Lancers kun championship experience maoy hisgutan.
Gitumbok sab ni Solis nga ang University of Cebu (UC) Webmasters maoy posibleng mo-abante sa finals ug maoy ilang ikabagat kun ugaling mag-abot sila sa CESAFI finals. Ang UC mao sab ang paborito sa miaging tuig, apan wala kini makasustenir ug sayong natagak.
Kini bisan pa og anaa kanila ang 6-foot-9 nga si Jun Mar Fajardo, kinsa anaa sa iyang katapusang tuig isip CESAFI player.
Ang ika-10 nga season sa CESAFI nga adunay tema “Power and Dominance” sugdan ugma sa hapon diha sa Cebu Coliseum, apan dili pa mag-abot ang Lancers ug ang Webmasters hangtod sa Agosto 22 diin sila maoy main game.
Sa iyang bahin, ang sakop sa UC coaching staff Caleb Gawangon ubos ni coach Roel Gomez, nagkanayon nga mas preparado sila karon kun itandi sa miaging tuig ug daku sila’g purohan bisan og daghan sila'g rookies.
Mao kini ang katapusang higayon nga mosuway pagsakmit ang Webmasters ubos ni Fajardo ug kun mapakyas sila karong tuiga, hayan aduna sila'y pagahimuong lakang aron palig-onon ang team.
Matud pa ni Bernard Ricablanca Jr, ang UC athletic director nga magsugod na sab sila sa sinugdanan human unya mogradwar si Fajardo ug posibleng adunay revamp sunod tuig.
Sa iyang bahin, si CESAFI commissioner Felix Tiukinhoy nagkanayon nga ilang gi-usab ang ubang mga lagda aron malikayan ang kontrobersiya sama sa miaging tuig nga wala kaayo magkasinabtanay ang ubang coaches ug team managers ilabi na sa nahitabo kang SWU Cobra star guard Eliud Poligrates.
Gipahibalo sab ni Tiukinhoy nga siyam lang ka players sa University of San Carlos (USC) Warriors ang kwalipikadong makaduwa tungod kay ang unom sa ilang 15 ka players adunay academic deficiencies. – BANAT NEWS