CEBU, Philippines - Mingaw ang kampanya sa University of San Carlos (USC) alang sa kampiyonato sa 10th Cebu Schools Athletic Foundation Inc. (CESAFI) human ang ilang unom ka players na-disqualify sa CESAFI Board sa pagduwa sa unang collegiate league sa Sugbu tungod sa ilang paglapas sa CESAFI by-laws.
Si commissioner Felix 'Boy' O. Tiukinhoy Jr. miingon nga ang 15-man roster sa USC nakibhangan ug aduna na la y siyam ka magduduwa human nasuta nga ang uban nilang players wala kaduso og mga rekisito nga nalatid sa kamandoan sa liga.
Dugang pa ni Tiukinhoy nga ang maong desisyon naaprobahan sa CESAFI Board atol sa ilang panagtigum didto sa Tin Gao Restaurant sa Waterfront-Cebu City Hotel and Casino.
Ang unom ka Warriors nga dili na makaduwa sa CESAFI Season 10 mao sila si Jacquines Andrew Bautista, Mel Steven Duran, Nicolas Kyl Magat, Tejay Napolitano, Edward Bakker ug Alfie Amarante.
Ang nahabiling siyam ka players nga mopas-an sa bagahi sa Warriors mao sila si Joven Cid Cortes, Sam Jordan Hermosa, Carl Miko Santos, Chino Uy, Jr., June Michael Cantonao, Robert Gines Codilla, Nilton John Otida, Mark Gil Panerio ug Giovanni Padillo, kinsa kasamtangang naa sa injured list.
Sa iyang sulat nga gipadala ngadto ni USC athletic director Bro. Rolando Sanchez, SVD ug head coach Mike Reyes, si Tiukinhoy mipasabot nga si Bautista walay sertipikasyon nga giduso gikan sa chair o sa dean o sa registrar nga walay subject na-enrolled tungod kay kini usa ka pre-requisite.
Sila si Duran ug Magat wala makapasar sa gipangayong passing percentages sa ilang tagsa-tagsa ka academic grades, si Napolitano ni-enrol lang og 12 units (kulang og tulo ka units nga nalatid sa CESAFI rulebook) atol sa miaging semester, si Bakker nilapas na og pito ka tuig nga gitugot sa matag player sa liga, samtang si Amarante nihatag og dokumento (purpose of transfer) nga dili opisyal gikan sa ilang tunghaan.
Dihang gipangayoan sa iyang komento, si USC assistant coach Ryan Betia nagkanayon nga naglaum silang maliso pa ang desisyon sa CESAFI Board apan si Tiukinhoy nagtuo nga final na ug executory.
“I think it’s already final because the CESAFI Board has decided on the matter. The appeal of USC has also been discussed and it’s up to them on how to deal with it,” matud pa ni Tiukinhoy.
Sa laing bahin, andam na ang tanan alang sa grand opening sa CESAFI Season 10 nga nagdala sa tema "Power and Dominance" karong Sabado sa hapon diha sa Cebu Coliseum. – BANAT NEWS