Yan C Rico, Puyat Steel may purohan pa

CEBU, Philippines - Nagkahayag ang dalan alang sa Yan C Rico ug sa Puyat Steel paingon sa semifinals human gipalagpot ang tagsa-tagsa nilang kaatbang sa nagkainit nga aksiyon sa LLBA Rollway Cup 2010 basketball tournament diha sa Villas Magallanes gym sa Sta. Lucia Property sa dakbayan sa Lapu-Lapu.

Gigiyahan ni Tata Bardago ang Yan C Rico pagkulit og kulbahinam nga kadaugan batok sa VKK-Roy Ichat, 67-66, samtang ang Puyat Steel midaog batok sa John Videoke sa iskor nga 69-63.

Parehong nagtinuhogay og mga puntos ang duha ka teams pagsugod nga miresulta sa panagtabla paghuman sa first period, 14-all.

Si Bardago mipabuhagay og 28 puntos ug si Mario Bancale mitimang og 12 puntos nga mao lang ang nakakuha'g double figures alang sa Yan C Rico.

Mahatod unta sa VKK ang duwa ngadto sa overtime dihang milabaw lang og dos puntos ang Yan C Rico na nahabiling 18 segundos sa regulasyon, apan si Rene Cuadra igo lang mitusak og usa sa duha niya ka free throws hinungdan sa ilang kapildihan.

Ang VKK gipangulohan ni Ugsimar, kinsa miburak og 15 puntos, samtang si Cuadra mitimang og 14 puntos ug si Allan Alian mitikdol og 12 puntos.

Sa laing aksiyon, si team owner mao mismo ang nangu sa iyang koponang Puyat Steel pinaagi sa pagposa og 20 puntos, gisundan ni Edgar Lungay sa iyang 15 puntos. Ang ilang point guard nga si Oca Fuentes mihipos lang og siyete puntos, apan daku gihapon kini'g natabang tungod sa iyang maayong pagpadagan sa ilang duwa.

Ang pilderong John Videoke gipangulohan sab ni Christopher Sayson nga mi-iskor og 19 puntos. Sila si Lito Magat ug Ernie Giganto mitimbre og 12 ug 10 puntos matag usa.

Karong gabii, ang Yan C Rico makigsangka sa Ace Penzionne sa pasiunang duwa sa alas-7 sa gabii, samtang sa main game sa alas-8 sa gabii magtigi ang Puyat Steel ug Ave Maria Sanctuary Park.

Ang modaog maoy makaangkon og katungod sa pakigsangka sa nagpaabot nga   Cavs ug Solmeat nga nakabaton og "twice-to-beat" advantage sa semifinals.

Ang LLBA Rollway Cup gipaluyohan sab ni Rolly Dela Pieza ug sa D' House of Sports ni Billy Nadado.

Puntos Matag Usa

Unang duwa:

YAN C RICO (67) - Bardago 28, Bancale 12, Cangsuco 9, Simbajon 4, Asilom 4, Edig 3, Espinosa 2

VKK/Roy I-chat (66) - ugsimar 15, Cuadra 14, Alian 12, Orque 9, Gutib 9, Malingin 6

Ikaduhang duwa:

PUYAT STEEL (69) - Belga 20, Lungay 15, Soroño 8, Fuentes 7, Labadan 5, Temporada 4, Tampus 4, Lirasan 4, Leofats 2

JOHN VIDEOKE (63) - Sayson 19, Magat 12, Giganto 10, Dela Piña 8, Igot 8, Daño 6. – BANAT NEWS