CEBU, Philippines - Gikatakda na sab nga mopakita sa iyang katakus sa paminsar ang tang-ang scrabble player sa nasud nga si Teodoro Martus Jr. sa National Association for Scrabble Association in the Philippines (NASCAP) tournament gikan sa Hulyo 31 hangtod sa Agosto 1 didto sa SM City-Makati Activity Center.
"I’m not so confident on my chances because there are good players who will be joining. What I can assure to the Cebuanos and to myself is that I will do my best for this competition," matud pa ni Martus.
Gawas ni Martus, iyang kauban sa University of the Visayas (UV) alumni nga sila si Michael Lapu ug Orville James Alagaban ug usa ka senior UV student nga si Jowar Ayuno ang nikompirmar sab sa ilang partisipasyon ning duha ka adlaw nga kompetisyon, nga magsilbe isip Luzon qualifying alang sa World Youth Scrabble Championship (WYSC).
Ang uban pang mga Sugbuanong players, kinsa mahimong kabahin sa internasyonal nga kompetisyon naglakip nila ni Joy Policher, Mae Villagonzalo ug Kheil Acasili sa UV, Nathaly Cabaluna sa University of San Jose-Recoletos ug Albert Alcovendras sa Cebu Institute of Technology. (BANATSPORTS)