Demolish team gilat-an sa Mawin's Kitchen

CEBU, Philippines - Midaog dayon ang Mawin’s Kitchen nilang team owners Sherwin Lequit ug Maia Adriatico dihang ilang gilubong ang Demolish team, 75-47 sa pagsugod sa Mawin's Kitchen Basketball Cup (MKBC) 2nd Conference niadtong Domingo diha sa Vicente Sotto Memorial gym sa Brgy. Punta Princesa, ning siyudad.

Mitukob sab og daog ang Panthers human makaipsot batok sa DMV Crystal sa iskor nga 67-65, samtang ang Emilmich ni team owner Emily Badon milumpag sa RJM Builders sa iskor nga 59-55.

Kanunay naglabaw ang Mawin’s Kitchen gikan sa pagsugod hangtod nga ilang gilubong ang Demolish team sa pagpangulo nilang Lequit, Mat Vallejo ug Lemuel Paguntalan.

Si Lequit miposa'g 13 puntos, si Vallejo midugang og 12 puntos, samtang si Paguntalan ug si Philip Sanding parehong mi-iskor og 10 puntos.

Sila si Niko Laborte ug Litoy Lambo maoy nangu sa Demolish team nga nagkumboya og 22 puntos.

Sa laing bahin, si Gabriel Bacaba maoy nahimong bayani sa Panthers dihang nailog niya ang bola ug mi-iskor sa winning lay-up sa katapusang otso segundos sa duwa.

Si Bacaba mikimada og 25 puntos, giabagan sab siya ni Aden Yray sa iyang 13 puntos.

Si Banjo Bantaya mikudlit og 22 puntos aron pangulohan ang DMV Crystals.

Ang Emilmich gipangulohan sab ni Titing Piliotas nga mibugha og 13 puntos, samtang si Bryle Mascardo mibahog og 14 puntos alang sa pilderong RJM Builders. (BANATSPORTS)