Cebu Niños manimawus sa 8th leg sa TOP

CEBU, Philippines – Walay laing sulod ang huna-huna sa M.Lhuillier Kwarta Padala- Cebu Niños kundi ang mamawi human sila masugamak sa finals sa 7th leg sa Tournament of the Philippines (TOP) batok sa Cobra Energy Drink niadtong Sabado.

Adunay kahigayunan ang Cebu Niños ni coach Raul “Yayoy” Alcoseba nga makabangun sa ilang sangka karon batok sa Taguig City sa 8th leg sa TOP karon didto sa Xavier University gym sa Cagayan de Oro City.

Ang Cebu makigpinaksitay sa Taguig sa pasiunang duwa sa alas-5 sa hapon, sundan sa sangka tali sa host team Misamis Oriental ug Ascof Lagundi sa alas 7:30 sa gabii.

Human nila gisakmit ang korona sa 1st ug 6th leg sa PBL-Liga merger league, nakasugat   og gidemalas sa 7th leg ang Cebu human naputol ang ilang impresibong winning-streak sa MP Pacman Warriors ug gilubong usab sila sa Cobra sa finals.

Apan karon desidido ang mga Cebuanos nga makabawi pinaagi sa pagsakmit og laing leg title batok sa tulo ka lig-ong koponan sa liga. (BANAT NEWS)