Pakyas si Casimero

CEBU, Philippines – Nahanaw sa mga kamot ni Johnriel Casimero ang kahigayunan nga mo-away alang sa world title batok ni Puerto Rican Ivan Calderon, kini human siya gipilde ni Ramon Garcia Hirales pinaagi sa 12-round split decision kagahapon didto sa Sinaloa , Mexico.

Gawas sa pag-ilog ni Hirales sa WBO interim light flyweight title ni Casimero, nahugawan usab sa Mehikano ang record sa garbo sa Omega Boxing stable kinsa nakahiagum sa labing una niyang pilde sud sa 15 niya ka away.

Unang mipahagurus sa iyang mga kinumo si Casimero sa sayung bahin sa away, apan gamit ang gitas-on sa iyang mga bukton, napagana ni Hirales ang iyang nindot nga counter-punching nga maoy misungag sa Leyte boxer.

Nakabuwelo si Hirales sa round 10 human niya nakorner sa kadaghan nga higayun si Casimero kinsa nagsalimuang pagpanagang sa mga mahait nga straights ug hooks sa Mehikano.

Human sa dose ka hugna nga binukbukay, duha sa tulo ka mga hurado ang miiskor og 115-113 ug 115-113 pabor ngadto ni Hirales, samtang usa ka hurado mihatag og 115-113 ngadto ni Casimero.

Sa supporting main event, napukan usab ang laing Pinoy nga si Federico Catubay sa iyang IBF super flyweight eliminator batok ni Rodrigo Guerrero pinaagi sa unanimous decision. (BANAT NEWS)