VKK, John Videoke buhi pa

CEBU, Philippines - Buhi pa ang VKK-Roy iChat ug ang John Videoke sa ilang kampanya alang sa lingkoranan sa semifinals dihang gipalagpot ang tagsa-tagsa ka kaatbang sa LLBA Rollway Cup 2010 basketball tournament niadtong Lunes sa gabii didto sa Villa Magallanes gym sa Lapu-Lapu City.

Ang VKK-Roy iChat naglisod sa pagpalayas sa Leo Auto Shop-Roro dihang igo lang kini midaog og dos puntos sa iskor nga 72-70, samtang ang John Videoke mitaktak sab sa AJY Bong, 82-76.

Topscorer sa VKK mao si Rene Cuadra pinaagi sa iyang 19 puntos. Si Eddie Alian miabuno'g 18 puntos, si Edwin Ugsimar mitimang og 15 puntos ug si Orque miariya'g 13 puntos. Ang nadusmo nga Leo Auto Shop gipangulohan sab ni Alan Sepe, kinsa mikambiyada og 20 puntos, gisundan nilang Ruben Dignos ug Arnel Patalinghug nga adunay 16 ug 13 puntos matag usa.

Sa laing aksiyon, si Lito Magat mi-iskor og 23 puntos aron pangulohan ang John Videoke, kinsa diha na nakatilaw og labaw sa final period ug mao na gani ang nikontrolar sa duwa hangtod na nga nahurot ang oras. Si Christopher Sayson miamot og 21 puntos, si Ernie Giganto mitampo'g 18 puntos ug si Danny Igot igo lang mi-iskor og nuybe puntos.

Upat ka players ang mirehistro og double figures alang sa AJY Bong sa pagpangulo ni Alan Yu pinaagi sa iyang 24 puntos. Si Celso Igot mitimang og 17 puntos ug sila si Joel Ochea ug Jack Soler nagkumboya og 21 puntos sa maong kapildihan.

Sa laing bahin, ang Cavs ni Dr. Michael Ouano, So Meat ni Leo Bascon, Ave Maria Sanctuary Park ni Raffy Senining ug Ace Penzionne ni Tony Amistas pormal na nga nakasud sa semifinals.

Isip top two teams paghuman sa elimination, ang Cavs ug Sol Meat makabaton og "twice-to-beat" advantage sa semifinals. – BANAT NEWS