Niños mokabkab sa ika-30 nilang daog

CEBU, Philippines - Maglaum ang M. Lhuillier Kwarta Padala-Cebu Niños nga mahimong unang three-leg winner sa dihang ilang gubaton ang host Cobra Energy Drink karong adlawa sa pagsugod sa seventh leg sa Tournament of the Philippines (TOP) didto sa Emilio Aguinaldo College gym sa Manila.

Gawas pa niini, ang Cebu Niños naglaraw sab sa ika-30 nilang sunod-sunod sukad pa sa Third Conference sa Liga Pilipinas sa miaging tuig diin sila nidaog sa tanan nilang 21 ka mga duwa, lakip na ang finals batok sa higpit nga karibal Misamis Oriental Meteors.

Ang duwa gitakda sa alas-2:30 sa hapon diin ang mga batos ni multi-titled coach Raul 'Yayoy' Alcoseba nakabaton og pabor sa   kasinatian ug gitas-on batok sa Ironmen nga kasagaran mga bag-o pa gikan sa kolehiyo.

Magsangka sa pasiunang duwa sa alas-12 sa udto mao ang ANI-FCA ug MP Gensan Warriors.

Gilauman mangu sa atake sa Cebu Niños mao sila si Stephen Padilla, Marlon Basco, Abby Santos, Bruce Dacia, Ian Saladaga ug Warren Ybañez. – BANAT NEWS