Pinay cagers naisahan ng Thailand
MANILA, Philippines - Ginupo ng Thailand ang Careline Pilipinas, 87-77 sa ASEAN School Games nitong Sabado sa Kuala Lumpur sa kabila ng kontrobersiyal na desisyon ng mga organizers na payagan ang mga Thailanders na paglaruin bagaman mali ang kulay ng unipormeng suot.
Dumating ang mga Thais na kakaharapin para sa gold medal game ang mga Malaysians ng may maling pares ng uniporme na nagbunga upang tawagin ng Careline-Pilipinas ang atensyon ng mga opisyal ng naturang torneo. Sa halip na tugunan ang protesta ng RP team, pinahiram ng mga league officials ang mga Thais ng uniporme ng Malaysia at pinayagan ang mga itong lumaro.
Nagprotesta ang Ever Bilena-backed RP team ngunit nanindigan ang mga opisyal ng torneo na tama ang kanilang ginawa at sinabing walang nilabag ang mga Thais.
Sa pangunguna nina Danica Jose at Tere Aseron na nagsanib puwersa para sa 41 points, 16 reboundsa at apat na assists, hinabol ng Pinay dribblers ang 30 puntos na kalamangan ng Thailand sa ikatlong quarter, 73-43 upang putulin ang lamang sa pito ngunit kinapos na rin sa huli.
May 17 puntos naman si Kitkat Nitorreda habang si Elrica Castro ay may 12 points at walong assists para sa RP-5.
- Latest
- Trending
