CEBU, Philippines - Lima ka teams mag-abot sa Mambaling Basketball Invitational Tournament Conor Cup karong alas-7 sa gabii diha sa Mambaling Sports Complex.
Kini mao ang Guadalupe, San Nicolas Proper, Poblacion Pardo, Tisa ug Inayawan.
Kasagaran sa mga misalmot nakaapil sa milabay’ng My City Games basketball tournament nga gipasiugdahan sa Cebu City Government ubos ni kanhi mayor ug karon South District Rep. Tomas R. Osmeña.
Si commissioner Danny Duran nagkanayon nga ang duwa pagahimuon matag Lunes, Miyerkules ug Biyernes didto sa naasoy'ng sports complex.
Gawas sa mga tropeyo, ang kampiyon mobulsa og P12,000, ang second placer P8,000 ug ang third placer makadawat og P5,000. Ang mapiling MVP makadawat sab og ganting salapi.
Kini maoy labing daku nga premyo sa kasaysayan sa torneyo sa Mambaling nga gipaluyohan sa Conor, usa ka cargo forwarding firm. (BANAT NEWS)