Binukbukay na karon sa Bohol

CEBU, Philippines - Laing hagit ang atubangon karon ni ALA Boxing Gym stalwart AJ 'Bazooka' Banal paingon sa iyang damgo nga masakmit ang world title sa dihang iyang sangkaon si Japanese-born Korean Big Yoo sa ilang 12 ka hugna nga binakbakay alang sa WBO Asia-Pacific bantamweight title sa main event sa “Sandugo-Labanan ng mga Kampeon” fight card karong gabii didto sa Carlos P. Garcia Sports Complex sa Tagbilaran City.

Tungod kay libre ang maong away, gilauman nga mokapin sa 30 mil ka boxing fans   ang mosaksi sa maong engkuwentro.

Gawas sa paghatag og nindot nga away alang sa mga Boholano, naglaraw usab si Banal nga modaog aron pamatud-an nga usa siya ka lihitimong world title contender human sa makauuwaw niya nga kapildihan ngadto ni Panamanian Rafael "El Torito" Concepcion atol sa ilang WBA interim super flyweight title match, duha na ka tuig ang milabay diha sa Cebu Coliseum.

Tuyo usab ni Banal nga mokulit sa ikaupat niyang sunod-sunod nga daog. Katapusan niyang gipilde mao ang Mehikanong si Cecilio 'Boga' Santos niadtong Enero diha sa Waterfront Cebu City Hotel and Casino.

Uban ni Banal nga moayag sa ilang abilidad karong gabii mao ang laing duha ka ALA Stable mainstays nga sila si Jason Pagara ug James Bacon.

Ang lightweight prospect nga si Pagara makigbinukbukay ni Young-Bin Kim sa Korea, samtang ang super featherweight nga si Bacon makigbinukbukay ni Eric Macas.

Molamas sab sa maong boxing card mao ang panagharong nilang Rey 'Boom Boom' Bautista ug OPBF title challenger Fernando Otic sa 3-round nga exhibition bout.   (BANATNEWS)