SMC mihatag P50,000 cheque ngadto sa SAC

CEBU, Philippines - Gipalig-onan og maayo sa San Miguel Corporation ang ilang pagpakisama uban sa Sportswriters Association of Cebu pinaagi sa pagdonar og P50,000 ngadto sa kahugpongan para sa umaabot nilang proyekto ug kalihukan. 

Si Manuel M. Moreno, SMC assistant vice president ug plant operations manager sa ilang Mandaue brewery, personal nga mitunol sa P50,000 cheque ngadto sa SAC nga girepresentahan sa tulo ka dagkung newspapers dinhi sa Sugbu (The Freeman, Sun Star ug Cebu Daily News).

Ang SMC dugay na nakig-partner sa SAC ug ang ilang pet project mao ang tinuig nga SAC-SMC All-Cebu Sports Awards nga anaa na karon sa ika-28 ka tuig.

Si SMC communications officer Girlie Garces sa sayo pa miingon nga dili kaayo daku ang kantidad nga gihatag, apan daku ang iyang pagtuo nga makatabang kini sa sportswriters pagbutang og "seed money" alang sa gilaraw nilang kalihukan sa tibuok tuig.

Sa iyang bahin, si SAC president John Pages, gikatakdang makigkita sa tanang mga sakop sa asosasyon aron tukion ang ilang mga proyekto ug kalihukan alang sa Cebu sports.   (BANATNEWS)