Espinosa mipakugang sa iyang mga kaatbang
CEBU, Philippines - Nasurprisa ang tanan ni Ramon Espinosa human niya gidominar ang category B sa Danao-Ilihan Road Race sa Danao City.
Nalupigan ni Espinosa ang usa sa tang-ang triathletes sa Sugbu nga si Elmo Clarabal, samtang ang beteranong seklista nga si Tyre Lambo nalandig sa ikatulo.
Si Noy Jopson, ang labing paspas nga Pinoy nga midagan sa miaging tuig nga Ironman Philippines, napunta sa ikaupat, samtang si Orlan Toring mikapyot sa ikalimang dapit.
Mikompleto sa top 10 finishers mao sila si Art Lambo, event organizer Ome Rodriguez, Ralph Sios-e, John Gayatin ug Ronald Alconera.
Sa laing bahin, si Ronnie Adlawan maoy mipatigbabaw sa 26 ka entrante sa Class C.
Si Luis Miguel 'Igi' Maximo mitapos sa 70 ka kilometro nga lumba, apan pakyas pagpahiluna sa unang dapit kay naluya na siya gikan sa Individual Time Trial (ITT) sa mountainbike nga iyang giapilan usa ka adlaw sa wala pa ang road race.
Giharian sab ni Jaime Noynay ang Class D division, gisundan ni Nelson Jaca, Crispin Solon, Pepe Rosales ug Delfin Omisol.
Sa mountainbike action, si Asay Navarro mao ang nidominar sa lumba, gisundan ni Bryan Lozano. – BANAT NEWS
- Latest
- Trending
