CEBU, Philippines - Parehong nakabagdok ang UTASSCO Utility ni Atty. Flor Yosores ug ang Park ‘N Go Bakeshop ni Romy Rama aron moabante sa finals sa Power Forty Summer League basketball tournament didto sa Inayawan Sports Complex.
Atol sa semifinals niadtong Martes, ang UTASSCO naka-eskapo batok sa F&E Electrical Supply, 118-112 bisan pa sa 43 puntos nga gipabuhagay ni Inayawan Brgy. Capt. Councilor Mario Tabar, samtang ang Park ‘N Go mipulbos sa Precious Ellah, 96-75.
Nabawi kini dihang unom ka players sa UTASSCO ang mibahog og double figures pinangulohan ni Wilbor Cabrera nga mikadlit og 28 puntos. Sila si Alex Mercado ug Jun Nacional miamot og 20 puntos matag usa.
Daku sab og natampo si Atty. Yosores, kinsa miposa'g 18 puntos.
Ang F&E Electrical Supply ug ang Precious Ellah, maoy magsangka alang sa ikatulong puwesto.
Ang finals himuon sa Hulyo 20 diin ang kampiyon modaog og P5,000. Ang second placer makadawat og P4,000, ang third placer makaangkon og P3,000. ug ang fourth placer mobulsa'g P2,000.
Puntos Matag Usa
Unang duwa:
UTASSCO (118) - Cabrera 28, Mercado 20, Nacional 20, Yosores 18, Abasolo 12, Yu 11, Pestaño 4, Alob 3, Labajo 2
F&E Electrical (112) - Tabar 43, Pacquiao 18, Mabalcon 15, Abasolo 11, Mosqueda 10, Cabatas 9, Navares 6
Ikaduhang duwa:
Park ‘N Go (96) - Arias 26, Layon 25, Ozon 16, G. Rama 9, Dejarme 7, R. Rama 6, Rama 5, Echavez 2
Precious Ellah (75) - Caballero 24, Traya 12, Cabañero 9, Nacario 8, Javierto 7, Navares 4, Rabadon 4, Abadejos 3 Samson 2. – BANAT NEWS