'Bon Jovi' Canillas mi-KO ni Tupas didto sa Lutopan, Toledo City

CEBU, Philippines - Mihimo na og pito ka sunod-sunod nga "knockout" nga kadaugan si Larry 'Bon Jovi' Canillas sa ALA Boy gym ug ang labing ulahi niyang biktima mao si Prell Tupas sa Manila.

Sayo nga gidaog ni Canillas ang away diin iyang gitumba si Tupas sa unang hugna sa ilang engkuwentro didto sa Lutopan Recreation Center sa Toledo City.

Nagpungasi nga right hook ni Canillas ang misampak ngadto sa nawong ni Tupas nga maoy nakapatumba sa bisitang boksidor sa oras nga 1:40 sa unang round ug tungod sa kakusog sa tama wala kini makabarog ug naabtan sa ihap sa referee.

Sa supporting main event, midaog usab pinaagi sa 4th round TKO ang beteranong si Jojo 'Flash' Intor batok sa Bol-anong si Romano Gelig sa ilang unom ka hugnang super bantamweight bout. Miluhod si Gelig sa unang hugna, ug nausban sa ikaupat nga round human maigo sa naghaguros nga kombinasyon ni Intor sa nahabiling 59 segundos nga mitapos sa maong away.

Mipatigbabaw usab si flyweight prospect Marjun Macahilig batok ni Mark Anthony Geraldo ug midaog pinaagi sa "unanimous decision." 

Gitagalan lang sa round 1 ni junior welterweight Naozumi Tsukiyama sa Japan si Jojo Arnado sa Cagayan de Oro City.

Si Richard Areta midesisyon ni Mark Jesson Taroja sa ilang bantamweight bout, samtang si Jicky 'Batang Boljoon' gisugat og daog sa iyang debut batok ni Charlie Sabijon.   – BANAT NEWS