Park 'N Go mihao'g daog

CEBU, Philippines - Krusyal nga three-point ang gitusak ni Danny Lisondra sa himalatyong oras sa duwa aron baswaton ang Park ‘N Go Bakeshop ni skipper Romy Rama ngadto sa kulbahinam kaayong 109-106 nga kadaugan batok sa Sta. Lucia squad sa double overtime sa pagbukas sa Talisay Balik-basketball Association (TBA) 2010 tournament niadtong Domingo didto sa Talisay Sports Complex.

Ang Park 'N Go naglabaw og siyete puntos, 26-19 sa sayong bahin sa first period ug nakasustiner pagmintinar sa labaw sa halftime, 45-38.

Nakagukod hinuon ang Sta. Lucia human sa ilang 29-14 nga rally ug mao na ang nilabaw og otso puntos, 67-59 paingon sa final period.

Apan ang Park 'N Go wala magpalupig ug mibawos aron tablahon ang duwa, 83-all pinaagi sa basket ni Kokoy Dequit hinungdan sa unang overtime. Nahitabo ang ikaduhang overtime sa iskor, 93-all.

 Gi-set up ni ex-SWU Cobra point guard Michael Arias si Lisondra didto sa kilid sa ilang goal ug inay mo-lay up, iya kining gipasa ngadto ni Lisondra, kinsa mibuhi sa iyang marka bahala nga three-point shot sa katapusang    2.7 segundos.

Si Lisondra nga maoy   bayani sa maong duwa, miposa og 14 puntos alang sa Park ‘N Go, apan sila si Dequit ug Jun-jun Alcordo maoy nangu sa ilang 18 ug 17 puntos matag usa.

Si Efren Mosqueda midugang sab og 14 puntos, samtang si Arias adunay 12 puntos alang sa Park ‘N Go.

Si Bebot Labuca miposa og 32 puntos aron pangulohan ang Sta. Lucia, sila si Cris Bascon ug Dodong Pacabis nagkumboya og 41 puntos, samtang si Archie Abarquez miabuno'g 14 puntos.

Puntos Matag Usa

Park ‘N Go Bakeshop (109) - Dequit 18, Alcordo 17, Lisondra 14, Mosqueda 14, Arias 12, Tojeno 9, G. Rama 7, Gonzaga 6, R. Rama 4, Camacho 4, Bacho 4

Sta. Lucia (106) - Labuca 32, Bascon 21, Pacabis 20, Abarquez 14, Abadies 9, Orteza 6, Gabison 4. – BANAT NEWS