CEBU, Philippines - Ang Giuseppe Football Club booters midaog sa Players 10 title sa 1st Treadtel Cup 2010 niadtong Domingo didto sa Aboitiz Sportsfield sa Subangdaku, dakbayan sa Lapu-Lapu.
Nahimong bayani si Joaquin Suarez sa Giuseppe FC human sa iyang duha ka sunod-sunod nga goals diin ilang gisirohan ang Sacred Heart School-Ateneo de Cebu, 2-0.
Sa pikas bahin, ang Sacred Heart School-Ateneo de Cebu mao sab ang milukdo sa Girls 14 crown human sa daginuton kaayo nilang kadaugan batok sa Subangdaku FC, 2-1.
Milampos sab ang PAREF Springdale booters sa ilang kampanya paglangkat sa inaugural Boys 12 title.
Hinuon miagi pa'g kalisud ang PAREF Springdale ni coach Mario Ceniza sa ilang sangka batok sa Canduman Football nga gipaluyohan sa M. Lhuillier una nila maangkon ang makutas nga kadaugan, 1-0.
Sa laing bahin, ang San Roque Football Club (SRFC) mao ang miangkon sa Players 8 title human nila sirohi ang ML-Canduman FC 1, 2-0 sa finals.
Ang duha ka weekend nga kompetisyon gipaluyohan sa Treadtel Tires ug gipasiugdahan sa Cebu Football Association. – BANAT NEWS