CEBU, Philippines - Manalipod sa iyang balwarte si Larry 'Bon Jovi' Canillas batok sa bisitang si Prell Tupas sa Manila sa 10 ka hugnang non-title fight karong adlawa didto sa Lutopan Recreation Center sa Toledo City.
Ang ALA rising star nga si Canillas (13-2, 11KOs) mosuway pag-iskor og laing knockout nga kadaugan batok ni Tupas (6-5-4) nga nailhan usab nga usa ka lig-ong boksidor.
Laing ALA fighter nga si Jojo 'Flash' Intor moladlad sab sa iyang abilidad batok ni Romano Gelig sa Bohol, samtang si Naozumi Tsukiyama sa Japan makigsangka batok ni Jojo Arnado.
Mokatkat na sab og balik sa ring si flyweight prospect Marjun Macahilig aron makigbinukbukay batok ni Mark Anthony Geraldo. Si Mark Jesson Taroja makigbatok ni Richard Areta ug si Jicky Gako makigsinukliay og kumo batok ni Charlie Sabijon. (BANATNEWS)