CEBU, Philippines - Usa nalang ka daug ang gikinahanglan sa Alaska Aces aron muabante sa semis human nila giusban ang Barangay Ginebra Kings, 84-82, sa Game-2 sa ilang “best-of-five” quarterfinals series sa PBA Fiesta Cup kagahapon didto sa Cuneta Astrodome.
Pinangulohan sa forward nga si Joe Devance kinsa miposa og 19 puntos, nakaipsot ang Aces gikan sa bangis nga fourth-quarter rally sa Ginebra aron masakmit ang Game-2 ug kahigayunan nga sirad-an ang serye karong Miyerkules sa Game-3.
Nagtangag og dos puntos nga labaw ang Ginebra sa katapusang uno minuto sa duwa, 81-79, apan nailog sa Alaska ang labaw human sa duha ka sunod-sunod nga tira sa import nga si Diamond Simpson.
Natabla hinuon sa import sa Ginebra nga si Christopher Daniels ang iskor, 82-all, apan ang pasa ni LA Tenorio ngadto ni Devance kinsa mipasulod sa iyang lay-up sa nahibiling 15.1 segundos maoy miselyado sa daug alang sa Alaska.
Aduna untay higayun ang Ginebra nga mohimo og milagro, apan igo lang miuntol sa ring ang tres ni Willie Miller, dayun bagting sa buzzer. – BANAT NEWS