Danao City Road Race mosikad karon

CEBU, Philippines - Magpaugatay na usab og sikad ang mountainbikers ug road racers sa ipahigayong Danao City Road Race karong adlawa didto sa dakbayan sa Danao.

Upat ka kategoriya ang tigian sa mga seklista ug kini mao ang mountainbike open ug racers class nga gibuak ngadto sa classes -- B, C ug D.

Ang mga mountainbikers ug class B racers mosubay sa rota nga may gilay-on nga 90-kilometros gikan sa Danao ngadto sa Lugo sa Sogod, samtang ang mga class C ug D riders motaak sa rota sa gilay-on nga 70-kilometros.

Sa iyang bahin, human sa malampuson niyang kampaniya didto sa Subic duha na ka semana ang milabay, ang Cebuano cycling sensation nga si Luis Miguel 'Igimax' Maximo mopakita sa iyang katakus sa maong lumba.

Alang ni Maximo, dakung hagit kini sa iyang abilidad tungod kay kontrahon niya ang mga beteranong seklista sa Sugbu ug dakung dungog na sa batan-on nga makasud sa top10 sa class C.

Kagahapon, si Igimax nalandig sa ikaupat sa   Executive A category sa Level Up Your Crank: MTB ITT Race diha sa Busay Hills sa Lahug, Cebu City.

Gitapos niya ang karera sa oras nga 19 minutos ug 29 segundos. (BANATNEWS)