1st Treadtel Cup 2010 banatan karong adlawa

CEBU, Philippines - Mo-ulbo na ang gipaabot nga 1st Treadtel Cup 2010 karong adlawa diha sa Aboitiz Sportsfield sa Subangdaku, dakbayan sa Mandaue.

Aduna kini pito ka kategoriya ug kini mao ang Players 8 and 10, Boys 12, Girls and Boys 14 and 17.

Ang Milo Little Olympics defending champion Abellana National School (ANS)-Pomeroy booters mosuway'g langkat sa inaugural title sa Boys 17 division, apan moharong pa kini og mga lig-ong kaatbang nga naglakip sa University of San Carlos, Sacred Heart School (SHS)-Ateneo de Cebu, Springdale Football Club ug Don Bosco Boys Home.

Ang ilang linghod nga koponan mao ang miangkon sa korona sa Boys 14.

Ang Canduman FC nga gipaluyohan sa M. Lhuillier mosuway og langkat sa Boys 12, Players 10 ug Players 8 categories.

Ang SHS-Ateneo de Cebu mao ang giatngan nga koponan sa girls 17 ug 14.

Gitukod sa Cebu Football Association (CFA), ang duha ka weekend nga kompetisyon gisuportahan sa Treadtel Tires.  – BANAT NEWS