Ace Penzionne daog batok sa Puyat Steel

CEBU, Philippines - Yano kaayong mikulit og daog ang Ace Penzionne ni team owner Tony Amistad human gilubong ang Puyat Steel, 87-69 sa LLBA Rollway Cup 2010 basketball tournament didto sa Villa Magallanes gym sa Lapu-Lapu City.

Parehong mipahungaw sa ilang kainit ug nagsinukliay og mga puntos ang duha ka koponan hinungdan nga sikit kaayo ang iskor paghuman sa first period, 18-17, pabor sa Ace Penzionne.

Sa sunod kuwarter, ang Ace Penzionne hinay-hinay na nga mihaling og mga puntos sa pagpangulo ni Temor Portugaliza aron inaton ang labaw ngadto sa siyete puntos sa halftime, 36-29 ug mitubo pa kini ngadto sa 70-56 paingon sa final period.

Si Portugaliza mao ang topscorer sa Ace Penzionne pinaagi sa iyang 23. Giabagan sab siya ni Buldog Ybañez nga adunay 14 puntos ug nilang  Sammy Lapoja ug Pader Decembrano nga mitusak og 11 puntos matag usa alang sa ilang 8-3 nga baraha.

Ang pilderong Puyat Steel gipangulohan sab ni Edgar Lungay, kinsa mibahog og 18 puntos. Sila si Albert Labadan ug Noli Paquibot nagkumboya og 31 puntos.

Sa laing bahin, ang Cavs pabilin gihapong nag-una sa liderato human nila gipilde ang Rollway, 72-67.

Ang Cavs nga nagbitbit og 9-1 win-loss record, gipangulohan ni Dandan Ramos, kinsa mitusak og 23 puntos. Sila si Archie Ompad, Jimboy Igot ug Ryan Ceniza mitimbre sab og double figures.

Si Amay Palad mao na sab ang nangu sa 4-5 nga Rollway nga mikimada og 20 puntos ug si Centes Brañanola mitiklo og 10 puntos.

Ang LLBA Rollway Cup gipaluyohan sab ni Rolly Dela Pieza ug sa D' House of Sports nilang Billy ug Judith Nadado.

Puntos Matag Usa

Unang duwa:

ACE PENZIONNE (87) - Portugaliza 23, B. Ybañez 14, Decembrano 11, Lapoja 11, K. Ybañez 8, Tojeno 8, Baguio 6, Pangatungan 6

PUYAT STEEL (69) - Lungay 18, Labadan 14, Paquibot 14, Soroño, Tampus 6, Leopats 5, Fuentes 4, Temporada 3

Ikaduhang duwa:

CAVS (72) - Ramos 23, Ompad 11, Igot 10, Ceniza 10, Lamoste 9, Bentazal 4, Ouno 3, Bontes 2

ROLLWAY (67) - Palad 20, Centes 10, Medina 9, Carulasan 8, Tubo 6, Areglo 4, Augusto 3, Sevilla 3. – BANAT NEWS