Tigers mipalagpot sa Realtors

CEBU, Philippines - Gitaktak sa Coca-Cola Tigers ang Sta.Lucia Realtors, 100-84, aron moabante sa sunod nga round sa wildcard phase sa PBA Fiesta Cup kagabii didto sa Araneta Coliseum.

Sikit ang duwa tali sa duha ka koponan sa first-half, apan mikambyada ang Tigers sa pagpangulo sa import nga si John Williamson kinsa miayag og otso puntos alang sa 41-38 nga labaw halftime.

Hinay-hinay nga mibiya ang Tigers human sila milusad og 16-7 rally sa tunga-tungang bahin sa third period pinaagi sa ilang mga pasbrek plays nga gibidahan sa mga guwardiya nga sila si Marvin Cruz ug Gary David.

Walay nakapugong ni David human kini mibugwak og 32 puntos nga conference-high nga maoy misugba sa depensa sa Realtors.

Sa maong kadaugan ang Tigers igo nalang nagpaabot sa mugawas nga mananaug tali sa Rain or Shine ug Air 21 Express (nagduwa pa ning pagsulat), aron ilang sangkaon second round sa wildcard diin ilogan nila katapusang luna sa quarterfinals.

Ang forward nga si Yussif Aljamal maoy top-scorer alang sa Realtors pinaagi sa iyang 17 puntos. Gidungog nga mabungkag na sunod season, ang Realtors manamilit sa katapusan nilang conference sa record nga 5 lima ka daug ug 13 ka pilde.   – BANAT NEWS