CEBU, Philippines - Nagkaduol karon si welterweight prospect Mark Jason Melligen sa gidamgo niyang world title fight human siya mikulit og laing kadaugan batok sa U.S based-African nga si Anges Adjaho kagahapon didto sa Grand Sierra Resort sa Reno, Nevada.
Dili hinuon sayun ang giagian ni Melligen sa maong away tungod usab sa gidak-on ni Adjaho maoy mihulip sa Mehikanong si Michel Rosales kinsa mao unta ang orihinal nga sangkaon ni Melligen alang sa ilang rematch.
Mipasulod og mga solido nga mga kinumo si Adjaho ngadto sa lawas ni Melligen sa round six, apan gikan didto ang lumad nga taga-Bacolod na usab ang mipauwan og mga mahait nga kombinasyon aron masakmit ang unanimous decision nga kadaugan sa iskor nga 97-93, 98-92 ug 99-91.
“Maayo si Adjaho, kusug siya manukmag, apan makaya ra nako ang iyang kinumo,” matud pa ni Melligen sa pakighinabi sa boxingscene.com, Si Melligen kinsa nakahukom nga mouli karong Hulyo 8 dinhi sa nasud misaka karon sa record nga 19-2, 13KOs, samtang ang kanhi African champion nga si Adjaho nakahiagum sa ikaduha niyang pilde sud sa 27 ka away.
Sa iyang bahin ang trainer ni Melligen nga si Tony Martin nagkanayon nga daku nga kadaugan kini alang sa iyang batos tungod kay dili basta-basta nga kontra si Adjaho tungod sa lig-on nga depensa niini. – BANAT NEWS