Ocareza naglaraw moduwa alang sa UC

CEBU, Philippines - Ang anak sa kanhi CCC Executive undergoal king ug magician nga si Benjamin Ocareza naglaraw karon sa pagpadayon sa iyang pagtuon dinhi sa Sugbo ug gustong magpa-enroll— siyempre sa University of Cebu diin tinguha sab niyang mahimong sakop sa Webmasters.

Ang 18-anyos nga si Benedict Ocareza kinsa bag-ohay lang migradwar sa high scool didto sa New York City, second degree cousin sa laing produkto sa Webmaster ug karon PBA star Dondon Hontiveros kinsa nagduwa alang sa San Miguel Beermen.

Ang batan-ong Ocareza gusto untang motungha sa UC karong tuiga sa kursong nursing apan matod pa sa ilang team manager nga si Atty. Baldomero C. Estenzo, serado na ang enrollment ug mahimo siyang motungha sunod tuig ug kinahanglan mo-uli siya dire sa Sugbo unya sa Abril o Mayo kung gusto gyud siyang matuman ang iyang laraw isip usa ka varsity player. Ang Executive maoy kanhi ngalan sa mga magduduwa sa CCC nga karon nahimo nang UC Webmasters ug si Atty. Estenzo gihapon maoy team manager.

Una untang nahuna-hunaan sa 5-11 nga shooting guard nga si Ocareza nga adto siya tungha sa Ateneo de Manila University apan ang suod nga family friend sa mga Ocareza nga si Anacleto “Dodong” Endrino, Jr. mitambag kanila nga adto lang sa UC kay nagkinahanglan sab kini’g mga maayong players nga makatabang sa ilang kampanya sa korona sa CESAFI nga wala pa gyud nila masakmit human sa duha ka pagsuway sa finals batok sa nine-time champion University of the Visayas (UV) Green Lancers.

Nailhan sa tawag nga Ben-ocs sa iyang panahon, si Ocareza kanhi gi-anggaan ug undergoal king sa karaang CAAA ug napatik ang iyang ngalan sa magasin nga “Bisaya” isip labing maayong undergoal operator sa Sugbo sa iyang panahon diin kanunay mawani ang modepensa kaniya tungod sa iyang mga acrobatic reverse lay-ups.

Ang mga Ocareza tua na manimuyo sa New York City. Ang asawa ni Ben-ocs nga si Joy usa ka registered nurse.  – BANAT NEWS