Super idols back to back champs sa IBP

CEBU, Philippines - Krusyal nga puntos gikan kang point guard Ramsey Quijano ug si Fermin Pepito maoy mituboy sa defending champion Super Idols ngadto sa 67-61 nga kadaugan batok sa Pecandela Law Firm kaniadtong Sabado aron sila molampos pagsakmit sa korona sa 4th season sa Integrated Bar of the Philippines (IBP) 2010 basketball tournament didto sa Capitol Parish gym sa dalan Escario, ning dakbayan.

Ang Super Idols ni playing coach Bong Pepito mao sab ang kamilyon sa miaging tuig ug milampos kini pagkulit og back-to-back nga titulo.

Sa sayo pa, ang undermanned nga Pañeros five mipukan sa mas tag-as nga Young Lawyers Association of Cebu (YLAC) sa iskor, 67-60 aron pag-angkon sa ikatulong dapit.

Ang awarding rites pagahimoon unya pa sa Hulyo 10, Sabado didto sa Waterfront Hotel sa Lapulapu City sugod sa alas 5 sa hapon sumala pa sa gipahibalo ni IBP cagefest commissioner Ian Sapayan.

Gikan sa sikit nga 18-14 nga labaw sa Super Idols, mipakita sa iyang liderato ang Super Idols guard nga si Quijano kinsa naka-iksor ug sagunson kuatro puntos gikan sa free throw ug si Pepito mibahug sab og krusyal nga jumpshots aron luwason ang ilang team.

Si Benjo Santiago maoy nangu sa Super Idols pinaagi sa iyang 20 puntos ug siya maoy hinungdan sa ilang pag-inat sa labaw ngadto sa 10 puntos sa third period, 49-39.

Mihimo sab og mainitong rally ang Pecandela didto sa fourth period diin sila nakasikit sa iskor, 57-59 may 47 segundos pa ang nahibiling oras apan wala sila makasustenir tungod sa mga puntos nga gisukli nilang Quijano ug Pepito.

Si Jessie Capoy maoy nangu sa Pecandela Law Firm sa iyang 19 puntos samtang midugang sila si Sam Malazarte ug Francis Pepito mihakot og 14 ug 13 puntos, matag usa.

Sa laing bahin, sila si Michael Molde ug Dennis Aliño maoy nangu sa Pañeros pinaagi sab sa ilang 14 ug 13 puntos, matag usa ug laing duha ka kauban ang miposa ug 10 puntos— sila si Joseph Calipayan ug Bert Ruaya.

Si Van Ligutan miburak og 22 puntos aron pangulohan ang opensa sa YLAC samtang sila si James Hupp ug Resty Arnaiz midugang sab og 10 puntos, matag usa.

Puntos matag usa:

First Game:

Pañeros (67)— Molde 14, Aliño 13, Calipayan 10, Ruaya 10, Cagulada 8, Manching 4, Pepito 3, Ordeniza 3, Denopol 2

YLAC (60)— Ligutan 22, Hupp 10, Arnaiz 10, Guieb 8, ang 4, Asis 2, Villarin 2, Prieto 1, Sapayan 1

Second Game:

Super Idols (67)— B. Santiago 20, F. Pepito 16, Quijano 10, Ibones 8, Abayon 5, Malig-on 4, B. Pepito 2, Garcia 2

Pecandela (61)— Capoy 19, Malazarte 14, Pepito 13, Gamallo 6, Enad 4, Dela Cerna 3, Gealon 2. – BANAT NEWS