CEBU, Philippines - Nakompleto na ang semifinal cast sa Borak Billiard Zone 1st 9-Ball Tournament human ang upat ka cue artists ang mipukan sa tagsa-tagsa nila ka kaatbang niadtong miaging gabii didto sa E-Zone sa Panagdait sa Brgy. Kasambagan, ning siyudad.
Sila si Noriel Pagador, Yben Montemayor, Rayner Espejo ug Roy Bana nagpabiling buhi sa ilang kampanya alang sa kampiyonato.
Si Pagador yano kaayong mipilde ni Philip Pare, 5-1, si Montemayor nakalingkawas batok ni Bernard Marbella, 5-4, si Espejo mibuntog ni Christian Bata, 5-2, samtang si Bana mimakmak ni Johnlo Playboy, 5-2.
Gawas sa customized cue sticks, ang top four winners makadawat og ganting salapi diin ang kampiyon mobulsa og P20,000.
Ang ikaduhang dapit makadawat og P10,000, samtang ang ikatulo ug ikaupat makaangkon og P5,000 ug P2,000 matag usa.
Makadawat sab og special prize ang mamahimong "Trick Shot King." – BANAT NEWS