Violet milupig sa Yellow sa Sunday Basketball Club caging

CEBU, Philippines - Naka-ipsot bitbit ang 90-89 nga kadaugan ang Violet team human nila gipilde ang Yellow sa kulbahinam nga duwa sa Phase 3 Camella Homes Sunday Basketball Club tournament didto sa Villa Magallanes gym sa Lapu-Lapu City.

Naglawig na unta ngadto sa kadaugan ang Yellow dihang milabaw kini og uno punto sa iskor nga 89-88, apan si Centes Brañanola nakakubit og foul ug iyang napasulod ang duha ka mahinungdanong free throws sa himalatyong oras aron luwason ang Violet.

Gawas sa pagluwas, si Brañanola mao sab ang topscorer sa Violet nga mi-iskor og 23 puntos. Laing tulo ka magduduwa ang mikutlo sab og double figures alang sa Violet nga nagtangag na karon og 3-2 nga baraha.

Si Bebot Pleños miabuno'g 20 puntos, si Dennis dela Pieza miamot og 13 puntos, samtang si team owner Rolly de la Pieza miariya og 12 puntos.

Ang nadisgrasyang Yellow team gipangulohan ni Alan Sepe, kinsa mipabuto'g 28 puntos. Si Amay Palad mitimbre'g 25 puntos ug si Ruelan Sumilang mitimang og 11 puntos alang sa Yellow nga adunay 2-3 nga baraha.

Sa laing duwa, ang Rollway Customs Brokerage maoy unang team nga mipahamtang sa labing unang pilde ngadto sa Kinship, 101-93.

Tungod sa maong kadaugan, ang Rollway ug Kinship nagsawo na karon sa liderato sa managsamang 3-1 win-loss records.

Si Baguio mikulit sa iyang career-high 37 puntos aron pangulohan ang Rollway. Si Allen Tarona mitampo'g 24 puntos ug si Sherwin Resilia miamot og 23 puntos. Samtang ang Kinship gipangulohan ni Dante Gilig, kinsa mibugha og 25 puntos, gisundan ni Jestoni Casquejo sa iyang 21 puntos ug Roland Panaguiton nga adunay 15 puntos.

Midaog sab ang Ryle Trucking pinaagi sa paglubong sa RMA Logistics sa iskor nga 96-81.

Si Adonis Morata mibugha og 25 puntos aron pangulohan ang Ryle. Sila si Tito Añana ug Troy Amodia parehong miamot og 16 puntos alang sa Ryle Trucking nga adunay 2-2 nga baraha.

Ang RMA Logistics gipangulohan sab ni Cortes pinaagi sa iyang 32 puntos. Sila si Ramil Geraga ug Ernest Ocampo nagkumboya og 27 puntos alang sa RMA nga wala pay daog sa upat ka duwa.

Puntos Matag Usa

Unang duwa:

VIOLET (90) - Brañanola 23, Pleños 20, D. De la Pieza 13, R. De la Pieza 12, Cortes 7, Almacin 7, Aparente 7, Balberona 1

YELLOW (89) - Sepe 28, Palad 25, Sumilang 11, Geraldez 9, Rabi 8, Tabaña 4, Villapez 2, Maratas 2

Ikaduhang duwa:

ROLLWAY (101) - Baguio 37, Tarona 24, Rasilia 23, Berido 10, Casquejo 7

KINSHIP (93) - Gillig 25, Casquejo 21, Panaguiton 15, Amores 9, Delgado 7, De la Pieza 5, Pleños 4, Flores 4, Sanchez 3

Ikatulong duwa:

RYLE TRUCKING (96) - Morata 25, Añana 16, Amodia 16, Tabalok 14, Casquejo 8, Palad 5, Brañanola 4, Moral 3, Oyanib 3, Rolon 2

RMA LOGISTICS (81) - Cortes 32, Geraga 15, Ocampo 12, Camacaylan 11, Reyes 5, Tecson 4, Ocaña 2. – BANAT NEWS