Delos Santos modagan sa Kuala Lumpur Marathon

CEBU, Philippines - Giilang reyna sa Cebu marathon nga si Mary Grace delos Santos ang gitakdang molarga karong gabii aron mosalmot sa Kuala Lumpur Marathon karong Domingo didto sa Malaysia.

Ang taga-Zamboanga nga si Delos Santos nga ania na karon magbasi sa Sugbu modagan sa labing una niyang international run ubos sa 21K category. Iyang ikalumba ang lain pang top rated international runners. 

Matud pa ni Delos Santos nga usa ka dakung regalo ang iyang nadawat atol sa iyang adlaw'ng natawhan niadtong Hunyo 11 dihang gitawagan siya ni Toby Claudio, ang founder sa RUNNR nga maoy moabaga sa tanan niyang galastohan didto sa Malaysia.

Si Claudio nagkanayon   nga angayan lang nga mahatagan og kahigayonan si Delos Santos nga ipakita ang iyang abilidad didto sa gawas sa nasud human sa iyang dominanteng performances sa   nangaging mga lumba sa Sugbu.

Usa sa nabiliban ni Claudio mao ang performance ni Delos Santos atol sa miaging Great Lapu-Lapu Run diin iyang gitapos ang 21K sa oras nga 1:24.32 aron pagsakmit sa korona sa women's division.

Daku ang pagtuo ni Claudio nga matalbugan pa   ni Delos Santos ang defending women’s champion nga si Beatrice Jebichii sa Kenya nga adunay 1:33.05 record. – BANAT NEWS