Pagara midaog sa Jonas Cortes Cup

CEBU, Philippines - Mipakita dayon og maayong labok si ALA Boxing Gym Albert Pagara human niini gipilde sa puntos si Christian Apawan sa Mandaue sa Mayor Jonas Cortes Boxing at the Park Amateur Series didto sa Mandaue Plaza Square.

Ang lumad nga taga-Misamis Oriental nga si Pagara maoy mipatigbabaw pinaagi sa pagpasulod sa iyang mga kinumo bisan pa sa lig-ong depensa ni Apawan. Si Pagara nakapuntos sa mga hurado, 2-1 alang sa labing una niyang daog sa 56 kgs. class.

Namawi hinuon alang sa host-Mandaue sila si Michael Romarate ug Basilio Sultan, kinsa midaog sa tagsa-tagsa nila ka mga sangka ubos sa 54 kgs. division.

Ang silver medalist sa miaging Palarong Pambansa nga si Romarate mipilde ni Melvin Gumba, 2-1, samtang si Sultan mipaundang ni Robert Labanza sa University of the Visayas (UV).

Midaog na sab si Vicente Seos-e Jr. sa Cabancalan human sa laing "unanimous decision" nga kadaugan batok ni Jodel Patindol sa Talamban sa 25 kgs. class.

Ang iyang teammates nga sila si Ferde San Roque ug Krisvie Jake Abarquez mipaksit sab og daog batok nila ni Kevin Jake Catajara sa Talamban ug Richard Barrios sa Bais City sa 45 kgs. division.

Si Jeramel Alcover mao lang ang bugtong boksidor sa Cabancalan ang napakyas human miyukbo ngadto ni Cherwellan Cantel sa Maguikay sa 45 kgs.

Ang bisitang si Rey Muñez sa Misamis Oriental mipilde ni Danlou Codilla sa UV pinaagi sa puntos, 2-1.

Namawi hinuon ang duha ka boksidor sa UV nga sila si Melvin Basinga ug Bryan Remedio pinaagi sa pagpilde sa tagsa-tagsa nila ka kaatbang. Si Basinga mipukan ni Rhyan Canillas sa Toledo City sa 57 kgs., samtang si Remedio mibuntog ni Namocatcat sa Mabolo sa 39 kgs.

Ang teammate ni Namocatcat nga si Christian Bacolod mikulata ni Elecio Taruc sa Lapu-Lapu City ubos sa 43 kgs. class.

Gisugat og daog si Elicio Eyac sa iyang unang daog pinaagi ni Ricky Traya sa Basak, Mandaue sa ilang engkuwentro sa 54 kgs. division. (BANAT NEWS)